«كۇيەۋىم بالالارىمنىڭ جاس كەزىندە قايتىس بولدى دا, ەكى بالانى ءوزىم جەتكىزدىم. پاتەردىڭ كەزەگىندە 30 جىل تۇرعان ەدىم, سول ارمانىم بۇگىن ورىندالدى. قۋانىشىمدا شەك جوق. ەلباسىعا شەكسىز العىسىمدى ايتامىن. استانا كۇنى مەرەكەسى جازدىڭ ورتاسىندا ادامدارعا بيىك رۋح سىيلايدى, ال ءبىزدىڭ وتباسى ءۇشىن بيىلعى مەرەكە باقىت اكەلدى», دەدى قۋانىشىمەن بولىسكەن گالينا ءابىلدينا.
بۇل تاپسىرىلعان ۇيلەردىڭ بارلىعى «نۇرلى جەر» باعدارلاماسى اياسىندا سالىندى. اتالعان باعدارلاما بويىنشا بيىل قوستانايدا 3000 شارشى مەتر ءۇي تۇرعىزىلسا, ول وتكەن جىلعا قاراعاندا كەمىندە 10 پايىزعا ارتىق.
«ەلباسىنىڭ سىندارلى ساياساتىنىڭ ارقاسىندا ەلورداسىمىز دامىپ, دۇنيە جۇزىنە بەلگىلى بولىپ وتىر. ەلورداعا بوي تۇزەپ رەسپۋبليكا ايماقتارى دا دامىپ كەلەدى. سولاردىڭ ورتاسىنان قوستاناي دا ورىن الادى. وعان دالەل, جىل سايىن جاڭا تۇرعىن اۋداندار بوي كوتەرىپ جاتىر. «اۋەجاي» تۇرعىن اۋدانىندا 47 ءۇي سالىناتىن بولادى. ونىڭ جارتىسىنا جۋىعى سالىنىپ ءبىتتى, قالعانىنىڭ قۇرىلىسى ءجۇرىپ جاتىر. بۇگىن جالعا بەرىلەتىن ءۇش ءۇيدى تاپسىرىپ تۇرمىز. ەڭ باستىسى مەملەكەتتىك ساياساتتىڭ ارقاسىندا قوستانايلىقتاردىڭ دا الەۋمەتتىك جاعدايى جىل سايىن جاقسارىپ كەلەدى. پرەزيدەنتتىڭ بەس الەۋمەتتىك باستاماسى بويىنشا جاقىندا عانا «7-20-25» باعدارلاماسىمەن قوستانايلىقتار العاشقى باسپاناسىنا يە بولدى. بىزدە 10 مىڭداي قوستانايلىق «تۇرعىنۇيقۇرىلىسجيناقبانكى» ارقىلى الداعى ۋاقىتتا وسى باعدارلامامەن باسپانا الاتىن بولادى», دەدى ارحيمەد بەگەجان ۇلى.
تاپسىرىلعان ۇيلەردى «ساۋلەت» قۇرىلىس كومپانياسى سالدى. ۇيلەردىڭ بارلىعىنا دا جەرگىلىكتى قۇرىلىس ماتەريالدارى پايدالانىلدى. اسىرەسە ۇيلەردىڭ بالكونى, قاسبەتى ساپالى جاڭا تەحنولوگيامەن جاسالعان ماتەريالدارمەن, تەرەزەلەرى جاڭا شىنى تۇرىمەن جاسالدى. وسىنداي ماتەريالداردى پايدالانعان ءار ءۇي قۇرىلىس كومپانياسىنا 25 ميلليونعا ءتۇستى. ول شىعىندى كومپانيا «رۋحاني جاڭعىرۋ» شەڭبەرىندەگى «تۋعان جەر» باعدارلاماسى بويىنشا وزىنە الىپ وتىر, ول پاتەرلەر قۇنىنا كىرمەيدى.
ءوڭىر باسشىسى وبلىستا تۇرعىن ءۇي قۇرىلىسى جالعاسا بەرەتىنىن ايتتى. قازىر «قوناي» تۇرعىن اۋدانىنىڭ ينجەنەرلىك جەلىسى جىلدام قارقىنمەن ءجۇرىپ جاتىر. «يۋبيلەينىي» شاعىن تۇرعىن اۋدانىندا 51 كوپ قاباتتى ۇيلەر سالىنادى. بولاشاق «بەرەكە» تۇرعىن اۋدانىنىڭ سمەتالىق قۇجاتتارى دايىندالۋ ۇستىندە.
ءنازيرا جارىمبەت
«ەگەمەن قازاقستان»
قوستاناي
